Y coetir coffa yn Brownhill – Y Wybodaeth ddiweddaraf

Yn dilyn fy ngohebiaeth flaenorol ar 22 Mehefin, rwy’n ysgrifennu i roi’r wybodaeth ddiweddaraf ichi am y cynlluniau ar gyfer y coetir coffa yn Brownhill, yn Nyffryn Tywi, Sir Gaerfyrddin.

Diolch i chi am gymryd yr amser i rannu eich adborth gyda ni drwy ein hymgynghoriad cyhoeddus a’r digwyddiadau galw heibio yn ystod ym mis Mawrth a mis Mehefin y llynedd. Roeddem yn falch o allu cysylltu â chymaint o drigolion a chael y cyfle i wrando ar farn a phryderon pobl ar y cynigion ar gyfer y tir yn Brownhill.

Ar ôl gwrando’n ofalus ar yr adborth a gawsom, rydym yn falch o allu rhannu’r dyluniadau ar gyfer y safle a rhoi gwybod i chi am y camau nesaf.

Mae’r safle bellach wedi’i rannu’n dri phrif faes, gyda phob un yn blaenoriaethu gwahanol amcanion. Bydd ardal gadwraeth fel bod cyfle i fywyd gwyllt ffynnu, ardal o goetir ar gyfer coffau sy’n gwbl hygyrch, ac ardal dyfu i ddarparu cyfleoedd cynaliadwy ar gyfer cynhyrchu bwyd, a choed a natur.

Rydym wedi nodi crynodeb o’n cynlluniau isod, gan amlinellu sut y byddwn yn cyflawni’r amcanion ar gyfer pob maes, gan ystyried yr ymatebion a gawsom drwy ein hymgynghoriad:

Ardal un – Ardal gadwraeth 

Prif amcanion 

Ein prif amcan ar gyfer y man cadwraeth yw gwella pwyntiau mynediad er mwyn sicrhau bod y cyhoedd a physgotwyr lleol yn gallu cael mynediad diogel i’r afon a chreu coetir glannau afon a choetir gwlyb er budd bioamrywiaeth a hyrwyddo gorlifdir actif iach. 

Sut byddwn yn cyflawni hyn: 

Ychydig iawn o ymyrraeth fydd angen ar gyfer ein cynlluniau cychwynnol ar gyfer y rhan hon o’r safle. Bydd yr ardal yn cael datblygu’n goetir glan yr afon ar gyfer hybu prosesau naturiol, fel sydd wedi bod yn wir ers deng mlynedd. Byddwn yn gwella mynediad cyhoeddus drwy adfer pont droed a sefydlu llwybr cerdded anffurfiol a fydd yn galluogi pobl a physgotwyr i gael mynediad diogel i lan yr afon a mwynhau’r bywyd gwyllt. Bydd arwyddion yn cael eu gosod i roi gwybodaeth i bobl ar sut y gallan nhw ddefnyddio’r ardal yn ddiogel yn ogystal â helpu i ofalu am yr ardal. Ymhen peth amser, byddwn hefyd yn archwilio cyfleoedd i wneud gwaith adfer ar y rhan o’r afon sydd wedi’i throi’n fwy o gamlas, a hynny er mwyn ei niwtraleiddio a’i gwella fel cynefin ar gyfer pysgod a thrychfilod.

Gellir gweld manylion llawn gan gynnwys mapiau a lluniadau o’r ardal gadwraeth trwy ymweld â safle’r prosiect ar Citizen Space o’r 19fed o Ionawr.

Ardal dau – Ardal y coetir

Prif amcanion 

Ein prif amcan ar gyfer ardal y coetir yw creu coetir llydanddail brodorol. Bydd hyn yn cynyddu amrywiaeth cynefinoedd ac yn darparu man gwyrdd y gall pobl ddod iddo i fyfyrio a chofio anwyliaid.

Sut byddwn yn cyflawni hyn:

Mae’r coetir wedi’i ddylunio i wella nodweddion presennol y safle a byddwn yn cadw man agored sylweddol i ddarparu cynefin agored pwysig. Er mwyn sicrhau bod y coetir newydd yn gallu gwrthsefyll bygythiadau o blâu a chlefydau a newid yn yr hinsawdd, byddwn yn plannu amrywiaeth eang o rywogaethau a llwyni, gan gynnwys Derw, Oestrwydd, Pisgwydd dail bach, Cyll ac Afalau surion.

Er mwyn helpu i wella mynediad cyhoeddus a sicrhau diogelwch ymwelwyr i’r safle, bydd maes parcio yn cael ei adeiladu. Bydd mynedfeydd presennol i’r caeau yn cael eu huwchraddio, a gosodir pontydd troed bychan er mwyn creu teithiau cylchol o amgylch yr ardal.

Bydd meinciau hefyd yn cael eu gosod ger y fynedfa a bydd coed ffrwythau a chnau yn cael eu plannu i greu nodwedd flodeuo yn y Gwanwyn a darparu ffrwythau i ymwelwyr a’r gymuned eu casglu. Rydyn ni hefyd wedi bod yn awyddus i gael enw priodol ar gyfer y coetir coffa. Gan fod y tir yn arfer bod yn rhan o Ystad Abermarlais a bod Afon Marlais yn ei groesi, caiff y coetir ei alw’n ‘Coedwig Abermarlais’.

Gellir gweld manylion llawn gan gynnwys mapiau a lluniadau o’r ardal gadwraeth trwy ymweld â safle’r prosiect ar Citizen Space o’r 19fed o Ionawr.

Ardal tri – Yr Ardal dyfu 

Prif amcanion 

Ein prif amcan ar gyfer yr Ardal dyfu oedd sefydlu partneriaeth i’n galluogi i ddarparu cyfleoedd cynaliadwy i dyfu bwyd, coed a hybu natur a gwella ansawdd dŵr, iechyd y pridd ac amrywiaeth cynefinoedd a rhywogaethau.

Sut byddwn yn cyflawni hyn:

Gwnaethom gyflwyno nifer o ddewisiadau ar gyfer cynyddu gorchudd o goed ochr yn ochr â pharhad chynhyrchu amaethyddol parhaus gan ofyn i’r ymgynghorai drafod rhinweddau’r hyn yr hoffent fwyaf ei weld yn cymryd lle. Cafodd yr awgrym o barhad cynhyrchu amaethyddol ochr yn ochr â mwy o orchudd coed dderbyniad da.

Y cynllun ar gyfer yr ardal hon yw cynyddu’r gorchudd coed i tua 20%, byddwn yn gwneud hyn trwy ledu’r cloddiau presennol ac ailsefydlu gwrychoedd ar hyd ffiniau caeau hanesyddol sydd wedi’u colli. Byddwn hefyd yn plannu ar hyd ymyl y cae ger y coetir presennol ac yn sefydlu Clystyrau o goed yn y caeau a fydd yn y dyfodol yn creu cynefin o fath o borfa goed.  Bydd y planhigion newydd yn cael ei ffensio i ganiatáu i bori barhau ar y rhan fwyaf o’r tir, a bydd y tir yn cael ei reoli yn unol â chyfarwyddiadau er budd bywyd gwyllt, iechyd y pridd, ac ansawdd dŵr.

Yn y tymor hwy, byddwn yn ceisio sefydlu partneriaeth ar gyfer rheolaeth hirdymor o’r ardal hon mewn cydweithrediad â fferm neu ffermydd lleol. Bydd hyn yn cynnwys cyd-ddylunio’r ardal ymhellach gyda’r potensial ar gyfer mwy o blannu neu gnydau eraill ar gyfer y glaswelltir sydd wedi’i wella a nodwyd yn ystod yr ymgynghoriad.

Gellir gweld manylion llawn gan gynnwys mapiau a lluniadau o’r ardal gadwraeth trwy ymweld â safle’r prosiect ar Citizen Space o’r 19fed o Ionawr.

Camau nesaf 

Wrth greu coetir newydd, rydym yn rhoi pwyslais arbennig ar weithio’n agos gyda chymunedau lleol a rhanddeiliaid i roi’r cyfle iddyn nhw fod yn rhan o’r cynlluniau a rhannu eu syniadau gyda ni. Rydym yn awyddus i barhau â’r cysylltiad rhagweithiol hwn yn Brownhill wrth i’r safle ddatblygu. 

Yn y dyfodol agos, byddwn yn creu cyfleoedd i wirfoddolwyr ein helpu i baratoi a phlannu coed ar y safle. Byddwn yn rhoi’r wybodaeth ddiweddaraf i chi am y dyddiadau a’r amseroedd ar gyfer y rhain atoch maes o law.